紅海，我來了

[Day 3] 27 Jun 2024（開羅 > 洪加達 > Port Ghalib > 紅海）

坐埃及航空由開羅 > 洪加達。

去開羅機場坐內陸機，要先過XRay再去櫃枱check-in，離遠未埋到XRay條人龍，就俾人推咗去另一條VIP XRay隊。呢條VIP XRay隊，俾小費就係快捷通道，唔俾小費就係留難通道，點齊人頭，交出100EGP，放行。

大鄉里繼續出省，短短45分鐘內陸機程，由高空見到埃及沙漠地貌變化不停，又要睇又要影，忙到不得了。

一邊沙漠，一邊紅海，蔚為奇觀。

洪加達內陸機場，單眼佬賣涼茶，一眼睇哂。

潛水公司安排由機場接送到碼頭Port Ghalib，睇表演咁睇司機將8人13喼塞入車😆。

由洪加達機場去碼頭Port Ghalib 要3個鐘，中途休息站嚟到呢間士多咁款既舖頭。

8罐汽水要850EGP（HKD150），但沙漠入面有凍飲有廁所，咩價錢都要俾。

只係手指指張地圖，小朋友立即走嚟話5 dollars，非常識做生意。

坐咗3個鐘車，終於到Port Ghalib。未夠鐘上船，先去餐廳醫肚。

【Port Ghalib】

40度天氣🥵，好難抗拒冰凍既啤酒。

可惜高溫又無冷氣，凍啤都變熱啤。

Buddy既Alfredo pasta味道過咸，諗住Margherita pizza比較穩陣，可能芝士問題，一啲都唔似食開既Margherita，沙律味道最正常。

可能pasta同pizza比較平（8至9歐元），所以味道麻麻。

另一buddy既貴價牛扒（2x歐元），牛扒配紅海蝦，評價均一般，芝士漢堡比較正常。

到底天氣太熱影響味覺？定呢度遊客區餐廳，唔理好醜，生意無憂？🤔

夠鐘上船，紅海，我嚟啦！