一風堂

睇番啲舊相，先醒起幾個月前喫咗一風堂．．．．．

話說一風堂剛登陸尖沙咀，未正式開店只係試業已經人山人海，正式開業後更日日只能望龍尾輕嘆，喫一餐要等唔知幾耐，都係等首輪熱風過咗先去試；
首輪熱風過咗，都要等九個字至個半鐘先有得喫．．．．

白丸 HKD68 + 蛋 HKD10

湯底夠熱，但麵條偏幼，上枱第一啖已覺麵條偏腍，仲有啲有鹼水味，食多兩啖更加腍．．．．
湯底稍咸，肉好鬼薄兼得兩塊，HKD68碗麵得兩塊肉稍為姑寒囉
加隻蛋成HKD10咁貴，自不然有啲期望，可惜期望越大失望越大，HKD10隻以為係味玉，可惜只係一隻溏心蛋但仲要唔多溏心
早知就慳番HKD10

赤丸 HKD68 + 蛋 HKD10

赤丸只係多咗啲辣味，弊點同白丸一樣，麵條太幼易腍無咬口，

財政大臣鍾意喫餃子，當然要試試
HKD38五大隻，大隻到有風都吹得起，咁既價錢咁既SIZE，以為個餡一定好掂，點知．．．
餃子皮非常薄，入面個餡都好鬼薄，好似一陣風咁，一啖喫哂成隻，感覺．．．．得條皮唔覺有餡
老實講，若果小小唔係專登咬開一半睇吓咩餡，根本唔會發現入面原來係有肉架！！唔係得條皮架！！

唉，個麵粗身啲，少啲鹼水味，唔使排超過半個鐘，唔加蛋，唔食風餃子，都可以再幫襯既