山中溫泉 よしのや依緑園

 [Day 7] 27 Apr 2026（白骨溫泉 > 高山 > 山中溫泉）

【よしのや依緑園】

地址：石川県加賀市山中温泉南町ニ-5

大江戸温泉物語Premium系列 【よしのや依緑園】

酒店門口有告示，因為有熊既關係，正門自動門閂咗，只能經手動既側門出入酒店。

講到有熊可能由正門入咁得人驚，本來諗晚飯後去超市行街，但停車場要行400米咁遠而且入黑遇到熊點算，唯有取消Shopping計劃留番喺酒店浸溫泉。

包早晚餐22,680円+150円x2入湯，免費泊車，停車場400米遠。

【一般和室15畳+広緣】，Check-in前已經鋪好床，唔係食晚飯時入你房鋪床。

房間景觀同埋大浴場景觀都係鶴仙溪，綠油油好舒服。走咗先發現呢度既桑拿係呢區最大規模，早知就試下啦。

大江戸温泉物語Premium系列，休息區有咖啡、汽水、紅白酒、梅酒、蕃薯燒酒、啤酒任飲，仲有雪條任食。

休息區正正係溫泉門口，浸完溫泉即刻食雪條，食完雪條再試均咁多款酒，爽。

晚餐自助餐，一如所料，有刺身壽司、牛扒、天婦羅、蒸海鮮、沙律、甜品、哈根大師雪糕果類，大江戶系列都有既大路嘢。

當地食材有石川縣蝦湯拉麵，自家製蘋果批，加賀棒茶布甸。仲有異國料理-海南雞飯。

今日晚餐最難忘唔係食物，而係人聲沸騰既旅行團其中一員，用餐期間將本來用作隔水蒸海鮮既塑膠蒸籠，直接放上酒精爐上面燒，塑膠蒸籠當然立即著火，餐廳職員反非常快，即刻拎水桶移走成組著火既器皿，可惜手快都阻止唔到氣味，燒膠臭味頓時充斥全餐廳，有啲影響食欲。

自助早餐，大江戶系列通常都有，自己拼既角切刺身丼飯、沙律、甜品，特別嘢則有香噴噴既櫻花蝦飯。

大江戸温泉物語Ｐｒｅｍｉｕｍ系列就係咁抵玩。

 [Day 8] 28 Apr 2026（山中溫泉 > 香港）

【ＪＡ白山 ファーマーズマーケットよらんかいねぇ広場】

地址：石川県白山市井口町に58-1

時間：09:15 - 18:30

今日下午機返屋企，師奶終於可以瘋狂買蕃薯芋頭薯仔。

好多海鮮好吸引，但有得睇無得買。

仲有精米所，即磨米殼。

【ＪＡ白山 ファーマーズマーケットよらんかいねぇ広場】

地址：石川県白山市井口町に58-1

時間：09:15 - 18:30

買完餸拿拿聲去食麵，勁多菜既タンメン、濃厚豬骨味玉ラーメン（980円+990円）。

11:50落單，12:10先有得食，以拉麵店既速度嚟講有啲慢。以為落單後幾分鐘就有得食，但有啲失預算，之後要趕入油趕還車，攪到食得好頻能，享受唔到。

最後還車，４程IC收5490円，成個旅程入咗9044円油。

今次第一次帶Debit Card出遊，用得Debit Card就盡量用，除咗免去現金數錢找續麻煩，無手續費之餘仲有0.4%回贈，不無小補。(無收錢賣廣告架！)

今個旅程，完。