東北 紅葉 健行 (Day 3 - 十和田湖)

25 Oct 2011 - 29 Oct 2011 東北．紅葉．健行 (DAY 3 - 十和田湖)

---

[Day 3] 27 OCT 2011 (十和田湖 > 奥入瀨 > 蔦沼 > 青森 > 八戸) 

本來諗住今日既行程會他他條條咁，唔使早起，喫飽朝食後坐遊覽船，再慢慢遊去蔦沼．．．
但因為尋日行唔哂奧入瀨，臨時改行程，

加上今個東北．紅葉．健行旅程，住得一間溫泉酒店，有得浸溫泉當然要浸盡佢。
所以今日又係早起，仲要05:00就起身，皆因ホテル十和田荘個大浴場，朝早05:30就開，
情願訓少陣，點都要浸多一次溫泉先check-out。

浸完溫泉，06:15又出發喇！咁早？去邊？
去睇乙女の像呀，十和田神社咁囉。
早起的鳥兒有蟲吃，晨光照住既紅葉特別靚，又可以拎啲model出嚟影相。

一路沿住指示，大約15分鐘，就見到十和田神社。
神社附近有好多參天巨樹，空氣好清新，吸慣油尖旺空氣既小小，
忍唔住大大力索多幾啖。

其實早起既又豈止小小同財政大臣兩個呀，途中就遇見幾個人組成既導賞團。
由4月中旬-11月上旬，每日都有大約一小時既無料導賞團，唔使事先報名，
只要响05:55前去到十和田ビジターセンター集合，
就會有人帶你遊覽：休屋湖畔～乙女の像～十和田神社～開運の小道
咁樣計落，小小同財政大臣兩條茂李，06:15一早出嚟四圍行都唔係好異類姐。

睇完十和田神社，當然去睇乙女の像。
去到乙女の像，己經有兩個大叔响樹擺哂靚位影緊相，
小小突然覺得，05:00起身都有啲遲呀，應該可以再早啲，然後出嚟睇日出添呀．．．．

睇完乙女の像，沿住湖邊行返去．
嘩！湖邊又大風又凍，吹到髻甩兼流鼻涕咁滯．．．

返到酒店07:10，即刻去喫朝食喇！！
[早餐]：ホテル十和田荘

嘩！人多到不得了，但尋晚去大浴場浸溫泉又唔覺咁多人喎。
朝食係自助形式，唔係得兩條咸菜一碗白飯，有沙律菜，蘋果，雞蛋，送飯醃菜，豆腐，麵豉湯．．．．
SHIP．．．食哂嘢走埋先記得，點解無同啲朝食同埋個會場影相架．．．

今日時間緊迫，check-out完即刻標去巴士站買兩張 十和田湖 > 青森 巴士券 (3000円x2)。
繼而標去買船飛，坐頭班08:15遊覽船去子ノ口，
原價1400円，用東北旅遊優待卡有優惠，平100円 (1300円x2)！！

船程大約50分鐘，08:15開船的話，09:05到子ノ口，
跟據尋日臨時改既行程，大約有兩個鐘可以再行奥入瀨。
08:05坐上船，等吓5分鐘，等吓又5分鐘，日本人唔係好準時既咩？點解仲未開船架，
等到08:20，離遠見到有班大叔慢慢行去碼頭，
小小即刻問財政大臣：嘩！咁多人，唔係等埋佢哋吖．．．．
點知，真係等埋佢哋，本來得十幾人坐既船，即刻變成八成滿呀！

條船一路行，其實一路有日文介紹，但係．．．小小唔識聽呢！！
唯有拎住張單張，自己搵景點睇。
老實講，風景係幾靚架，但值唔值1300円就見人見智喇，
但去旅行，今次唔坐下次未必再嚟果隻，叫做試過坐過咁囉。

原本09:05完既船程，09:15先完。

[暫時是日消費]
巴士:6,000YEN
船:   2,600YEN
－－－－－－－－－－
總共：8,600YEN

註：
- 東北旅遊優待卡坐遊覽船有優惠，減100円
- 由4月中旬-11月上旬，每日有大約一小時既免費既導賞團　〔十和田湖早朝自然散策ガイド〕，無須事先報名，有興趣可以05:55响十和田ビジターセンター前集合就可以參加