東北 紅葉 健行 (Day 2 - 奧入瀨 - 中)

25 Oct 2011 - 29 Oct 2011 東北．紅葉．健行 (DAY 2 - 奥入瀨)

---

[Day 2] 26 OCT 2011 (八戸 > 奥入瀨 (下) > 十和田湖)

响三乱の流れ影完相，繼續向石ヶ戸進發。
去到石ヶ戸，果然有一堆人响樹，條路變得好熱鬧，
好多行山裝束人，好多旅客 (普通波鞋牛仔褲果啲)，仲有好多架旅遊巴，仲有一堆公公婆婆。

一去到啲人多位，小小周身都唔多自在，
因為啲公公婆婆見到有個宅女帶哂啲公仔玩具去行山，仲幫啲玩具擺pose影相，
好奇响樹裝個宅女點擒高跪低影公仔．．．．．

過咗石ヶ戸無耐，都差不多兩點，係時候野餐喇！！ 

[午餐]：NRE 駅弁

搵咗張野餐枱坐低，拎哂啲駅弁呀，生果呀，水呀，啤酒呀咖啡呀出嚟哂冷。
雖然天氣凍影相麻煩，影一陣就凍到手指僵哂，但可以帶駅弁去野餐，無咁快變壞；
但天氣凍得滯，啲手指僵到無感覺，拎唔實筷子喫飯盒．．．．早知拎隻叉喇．．．

望住啲咁靚既風景野餐，真係喫都喫得特別開心！！
雖然好凍．．．．．．．仲喫住個凍冰冰既飯盒．．．
如果個駅弁係發熱式既米沢牛或前沢牛，再加多杯熱綠茶就真係perfect喇！！

左邊駅弁1300円，右邊1100円
喫完駅弁，執好垃圾又繼續上路。(沿路都唔見有垃圾筒，啲垃圾要由頭托到終點)

其實除咗有牌既地方靚之外，有啲無名既溪流位都幾好睇，
所以唔一定要迫哂响有名牌既地方影相，沿途有好多位都影到靚相

咁有名牌既位，點都要影吓到此一遊相既。
馬門岩

阿修羅の流れ

飛金の流れ，千筋の滝

雲井の滝，白布の滝
途中遇到一位好心香港人兄，聽到小小同財政大臣講廣東話，佢見已經開始天黑 (未夠16:00)，好好人咁由千筋の滝車我哋去雲井の滝，等我哋行少兩步

白銀の流れ

原本諗住14.2k，對兩條茂李嚟講絕對無問題，
17:10應該可以去子ノ口，到但原來低估咗影相擺model陣同埋個天咁快黑既時間囉．．．
去到雲井の滝，個天已經好鬼暗，又多雲，又間中毛毛雨，
好在由石ヶ戸開始，啲紅葉已經無咁壯觀，可以由雲井の滝開始快放，
趕去下一個巴士站位 - 雲井林業 - 雲井の流れ，
途中經過白銀の流れ都無咩心機影相，個天好鬼黑，強開閃光燈先按到快門，
求其影兩幅相又趕路，終於16:00到雲井の流れ，
上到16:05班東北巴士。(750円x2)
其實趕唔切都唔太大問題既，仲有兩班巴士，晏啲之嘛，個天黑哂之嘛．．．
如果遲一個鐘天黑，或者雲井の流れ同銚子大滝中間多個巴士站，就可以行多陣。
．．．
唉，早知就買張八戸 > 十和田湖 巴士券喇 2600円，
以為八戸 > 燒山(1900円)，子ノ口 > 十和田湖(590円)，加埋慳咗110円，
點鬼知家陣 八戸 > 燒山(1900円)，雲井の流れ > 十和田湖(750円)，加埋仲俾多咗50円．．．失策失策．．．

[暫時是日消費]
駅弁：2,400YEN
飲料：  500YEN
巴士:1,500YEN
－－－－－－－－－－
總共：4,400YEN

註：
- 全國JR PASS可免費乘坐JR BUS，JR EAST PASS不可免費乘坐JR BUSS
- 東北巴士車票可於以下JR駅既みどりの窓口購買：八戸，青森，新青森

- 八戸 > 十和田湖 巴士券，一天內有效
- 例:由十和田湖温泉郷開始，可以中途落車，再上下一班車往十和田湖
- 十和田湖 > 八戸 巴士券，一天內有效
- 例:由十和田湖開始，可以中途落車，再上下一班車往八戸，但十和田湖温泉郷後落車，巴士券則失效

- 青森 > 十和田湖 巴士券，兩天內有效
- 例1:由萱野茶屋開始，可以中途落車，再上下一班車往十和田湖
- 例2:由青森出發，去到酸ヶ湯温泉落車，住一晚，第二日，可用同一巴士券再坐巴士往十和田湖
- 十和田湖 > 青森 巴士券，兩天內有效
- 例1:由十和田湖開始，可以中途落車，再上下一班車往青森，但萱野茶屋後落車，巴士券則失效
- 例2:由十和田湖出發，去到酸ヶ湯温泉落車，住一晚，第二日，可用同一巴士券再坐巴士往青森

- 詳情可參考JRバス東北