東北 紅葉 健行 (Day 3 - 青森)

25 Oct 2011 - 29 Oct 2011 東北．紅葉．健行 (DAY 3 - 十和田湖 > 奥入瀨 > 蔦沼 > 青森 > 八戸)

---

[Day 3] 27 OCT 2011 (十和田湖 > 奥入瀨 > 蔦沼 > 青森 > 八戸) 
13:35 - 15:34 巴士準時出現，由蔦溫泉 - 青森。
又係用今朝買既巴士券上車，上車都係要抽飛仔。

聽聞由青森去十和田湖既車程風景靚過由八戸去十和田湖，
所以小小安排行程時，由八戸入青森出，咁就可以睇哂兩邊風景；
由蔦溫泉往青森，途經睡蓮沼，酸ケ湯，ロープウェイ駅，三内丸山遺跡。

風景確實唔錯，紅葉見頃的話，真係坐車都唔得閒訓覺，
可惜紅葉已經枯咗大部份。
風景靚係要付出多丁丁，因為沿途都係山路，左轉右轉，
坐慣地鐵既小小，食飽啲都會暈車浪，真係好在未喫午餐．．．．

途經酸ケ湯，真係唔浸都要影吓相 (响架車上面影)
本來有諗過去酸ケ湯浸日歸，但．．．
聞說酸ケ湯好多人，小小又得條毛巾仔，又唔想俾錢買件溫泉衫，
時間又唔係好夠喎．．．．總之就一大堆理由，最終無去酸ケ湯浸日歸。
下次喇，下次住酸ケ湯，就會試個千人溫泉。

上年去青森睇祭時無去三内丸山遺跡，
見到巴士路線又經喎，本來有諗過出青森時，
落車睇完三内丸山遺跡再用張巴士券上番車，咁咪又賺多個景點囉，
好在無咁做，因為張巴士券過咗萱野茶屋之後落車，
就唔可以用同一巴士券再坐去青森，要再俾錢架喇。

一落巴士，即刻衝去搵食喇，三點半仲未喫午餐，財政大臣餓到呱呱叫。

[午餐]：亞希

舊年喫過覺得好味，今年同財政大臣一致同意，今次番兜。
本來有擔心，幾呢啲下午茶時間，會中場休息，好在去到都有開門有得喫。

叫番同上年一樣既定食。
炸豬定食 1360円，特製ふりい丼 780円。
個吉列蝦，吉列魚，吉列青椒同以往一樣好味，最出色都仲係魷魚，
一件咁厚肉既魷魚，炸完可以一啲都唔韌，仲好有魷魚味。

但個吉列豬，唔知點解，今次再食覺得不外如是，
舊年明明覺得好美味架，有肉汁無咁鞋架，
今次再食，唔係唔好食，但好似香港既とん吉仲好味過佢，
點解咁架．．．．

睇番相先發現，上年用nikon影呢兩盤吉列好鬼靚架，睇見都流口水果隻，
今年偷懶用casio機仔影，諗住影完拿拿聲開餐，
嘩，啲色真係差好遠．．．．
係咪因為咁既原因，小小今年無咁尊重呢兜吉列豬，
要罰小小，所以無咁好味呢？

填飽咗個肚，去青森県観光物産館アスパムshopping。
舊年可能係夏祭，人多好熱鬧，好多嘢睇咁款，
今年再嚟，好似好靜雞雞咁，店員仲多過顧客．．．

行均哂啲土產店格哂價，今次醒喇，一樣價錢就集中哂响アスパム物產買，
埋單仲記得用東北旅遊優待卡，買滿1000円送兩張明信片。


小小shopping時望嚟望去，想買果啲金賞蘋果蛋糕呀，蘋果批呀咁，
但想買又唔買之間咁，貼個貼紙又話金奬金賞，好似好巴閉，
又好似好美味，但價錢又唔平喎四件批仔索價600円，個心十五又十六．．．．
突然，一車日本大叔大嬸嚟到，個個拎住一個購物籃，
大手大手好似唔使錢咁掃入啲蘋果蛋糕同埋蘋果批，
明明一楝楝既貨，眨眼間得番一兩盒，
小小睇到眼定定之際，即刻唔執輸搶番一件！！

真係吖，明明都仲十五十六，結果人買我又買．．．．師奶本性真係表露無遺。
行完観光物産館アスパム，當然要去新開既A-FACTORY喇，
咁大個蘋果logo，應該以蘋果產品做主打喇，
小小呢個蘋果粉絲，當然要去朝聖！！

A-FACTORY 果真用蘋果做主打，好多蘋果啤酒呀，蘋果Sparkling wine，
蘋果汁呀，烈酒呀，果乾呀，真係又睇到樣樣都想買，
又有菜呀蔥呀大蒜黑蒜喎，唔買齋睇都好鬼開心！！
望望吓，唓！頭先啲大叔大手掃入既蘋果批呀蛋糕呀，呢樹都有，仲成大楝，
邊使荒無得買。

A-FACTORY呢樹仲有FOOD COURT ，但間間都係賣啲甜品輕食咁，
財政大臣又唔多鍾意呢類嘢食，結果無綠响樹開餐。
上一層有得試酒 (當然要錢！！)，可以試飲唔同款既蘋果酒咁。

A-FACTORY對面仲有一座紅色既建築物，好似一個紅色既大貨櫃咁，
原來係青森市文化観光交流施設ワ・ラッセ，入面當然又有土產賣喇！！
有嘢賣，師奶小小當然又要去行喇！！

行咁耐，以為好夜喇，望吓錶先18:25，去AUGA望吓仲有無土產賣呀海鮮丼喫咁囉。
行到去先見到18:30閂門，啲舖頭閂哂門，唔使諗响呢樹晚餐喇！！
算吧喇，兩個鐘頭前先喫過午餐未肚餓！

咁改行去行書局同JR站對面啲街邊生果檔，跟住坐JR返八戸。
19:05 - 19:11 青森 > 新青森
19:33 - 20:00 新青森 > 八戸

返酒店放低哂啲土產，又出去搵食，未喫晚餐架。
行均成條街，來來去去都係啲居食屋，
財政大臣個心明明想喫有馬肉果間，都仲要望來望去揀來揀去，
無耐性小小一路反眼一路跟住財政大臣周街行．．．．

財政大臣跟住又扮民主：想喫咩呀？
無耐性小小一路反眼一路咀藐藐：有馬肉果間喇，唔好再行喇

 [晚餐]：天竜食堂

舖仔細細，由兩個婆婆主理。
婆婆唔識英文，兩條茂李唔識日文，餐牌無公仔無圖片，咁點樣叫嘢食？
要知道日文裡面都有漢字架嘛，咁咪點果啲丁丁睇得明既嘢食囉。馬なペ定食 1700円：有個馬字，當係馬肉喇，隔離仲要寫住冬季限定，多數係熱嘢喇
財政大臣本來想喫馬刺，但又怕唔知咩味，穩陣啲要個熟既

天竜海鮮丼スペシャル 1600円：海鮮丼，最穩陣

(上) 馬なペ定食：果然係熱嘢，仲要熱到用鍋上，婆婆仲用身體語言提我哋小心個鍋辣手
個鍋好大，大食財政大臣都差啲喫唔哂。
除咗鍋大，料都好多，個汁好香，佐飯一流，好多黃芽白，馬肉好似牛肉咁味，唔錯

(下) 天竜海鮮丼スペシャル：驚瀨嘢小小，當然喫海鮮丼，刺身普普通通喇，
最好味係魷魚，因為呢樹盛產魷魚嘛。

[住邊]：コンフォートホテル八戸

呢間酒店又近又舒服早餐又ok，當然住番同一間酒店 (5800YEN)。

[是日消費] 
巴士:6,000YEN
船:   2,600YEN
午餐(亞希)：2140YEN
青森県観光物産館アスパム土產：6732YEN
A-FACTORY 土產：499YEN
晚餐(天竜食堂)：3300YEN
酒店：5800YEN 
－－－－－－－－－－
總共：27,071YEN

註：
- 酸ケ湯：立寄り入浴大人600円