拉大隊喫貴價菜

是日去新羅寶喫貴價韓國菜，點咗兩個四人餐。

是日餐粥：南瓜SOUP，好香好濃

雜菜炒粉絲：粉絲煙煙韌韌，好味

六小碟：最鍾意泡菜，蘿蔔，芽菜，其他對小小嚟講太辣喇

蠔仔煎餅：又係煙煙韌韌，熱辣辣

煙牛肉脊片拌雜菜 (前)，烤特級雪花肥牛 (後)

烤特大牛排骨

送既蒸雞蛋：太耐無喫過有蛋香既雞蛋，一盤簡單既蒸蛋，個個都話正

烤鮮大蝦：普普通通，單點就唔值

石鍋雜綿飯

鮮牛肉鍋自製麵

紅棗湯：呢個凍既紅棗湯，唯一一碗喫唔哂既嘢，因為小小唔鍾意凍既紅棗水

有喫過韓國菜，都估計到呢餐唔少嘢，
我哋仲點咗兩個四人餐，係咪以為我哋發咗達？？

非也，呢餐每人二百蚊有找，因為．．．．．
上咗深圳喫呀，一個四人餐RMB740，已經平過香港一截，
做埋VIP仲即場有折，所以咪二百蚊有找囉．．．．

京蔥炒羊肉

小小出關之後，除咗出街玩，出街喫好嘢之外，都仲記得煮飯

。
太耐唔煮飯，啲米會生牛，飯煲會生秀，隻鑊會發霉，最閉會俾人投訴！

作為一個扮哂精明又鍾意偷懶既師奶，
閒時逛超市，見到啲未到期又有特價既凍肉，就要買定嚟存倉，
戚起條筋要扮哂嘢煮下飯，打開個雪櫃都有餸嘛！

早排買咗包特價$29.9既小肥肥羊肉，近排又見到有京蔥$2，
即刻買一條京蔥就可以返歸開工。材料：
1. 小肥肥羊肉一包
2. 京蔥一條打斜切成小段
3. 蒜頭，乾蔥，，豉油，糖，鹽，酒呀．．．．鍾意落咩都得

做法：
1. 丁丁油，爆吓蒜頭呀乾蔥呀咁
2. 成包小肥肥羊肉倒哂入去
3. 炒到羊肉出哂油，將羊肉撥埋一邊
4. 用羊肉標出嚟既油爆京蔥
5. 最後將撥埋咗一邊既羊肉同爆香既京蔥兜番哂一齊，調吓味
6. 禮成
影呢幅相時都唔覺有咩，家陣睇番真係唔多掂。人地啲真正精明師奶，影啲餸相好靚架嘛，打哂燈，靚杯靚碗靚碟，
背境仲有花有草幾咁優雅，．．．．

你睇你睇，張相用報紙舖枱，飯枱有個環保袋，仲有啲環保紙，
隻裝餸碟又娘，連個飯碗都咁娘，腐乳通菜碗腐乳醬又走咗出嚟，
又影到個筷子頭．．．．．唉．．．係咪要收番埋張相好呢？！

飯腳們，Long Time no See!

早排係咁測驗，考試，做功課，溫書．．．好耐無見過班飯腳喇！
出關之後，當然要約下啲飯腳，食吓飯吹吓水先得架嘛！！

今次揀咗大中華飯店聚頭。
點咗九樣餸，坐咗兩個鐘，飲咗三枝朝日，幾罐汽水，埋單HKD630。
老實講，食物咩味道真係唔係好記得，只係記得同班飯腳吹水吹得好開心，
一餐開心既飯，食物係其次，同咩人喫先係重點。

05/20/2010 - 05/21/2010 順德番禺2日之旅

05/20/2010 - 05/21/2010 順德番禺2日之旅

---

[行程資料]
去程 : 08:30
回程 : 18:00
旅費 : HKD448  (每天小費HKD50)
時差 : 沒有
酒店：豪悅酒店
交通 : 旅遊車

[Day 1] 20 May 2010 (深圳 > 南沙 > 順德 > 番禺)

見考完試，連同師奶一齊扮乖，同CEO北上玩番轉。
為免CEO辛苦，跟下好耐都無試過跟既鴨仔團，唔用腦咁玩兩日。

呢次跟既鴨仔團，聽聞口碑唔錯，齋玩齋食，無呃錢手信店，無呃入場費景點，上車落車，食飯訓覺，啱哂唔想用腦既小小。

08:30 向深圳集合，坐個零鐘到南沙，10:40到達第一個景點：南沙水鄉。

呢個所謂南沙水鄉一條街，好明顯係中途停停車，放放水，鬆下對腳之用。
成條街，街頭行到街尾，唔使三分鐘，街頭一間糖水店，街尾一間手信店；
中間有啲亭台樓閣，離遠睇好似幾靚，近睇又維修又欄路。

望住呢條街，小小突然間體會到，影相既最高技術，係將爛鬼一條街影到好似好靚，令到身邊既人以為呢個景點好正．．．

影完呢個扮哂景點既景點，向下一個地方進發 - 寶林寺。
12:40 唔知頭唔知路既小小，超初以為去寶林寺只係睇下佛，
點知原來睇佛之餘，午餐向樹喫齋。

見到好神心咁參拜既CEO嘛？！

13:30 喫完齋，落番山腳，景色唔錯，啱哂試相機。

16:00 下個景點叫大夫山森林風景區，可以睇湖光山色，翠綠樹林。
出發前睇咗天氣預報，話會落大雨呀，點知雨毛都無；
又曬又熱，仲熱到肥油都出埋，幾靚既湖光山色都無心機睇，
何況呢個大夫山都唔覺靚．．．．熱到咩心情都無

．．．

16:30 睇完大夫山，下一景點係番禺博物館。
嘩！博物館呀！有冷氣呀！快啲去呀．．．．

熱到痴咗線既小小，只記得博物館有冷氣，睇咗啲咩都唔係好記得

爭啲連去過博物館都唔記得

17:00 睇完呢個景點，下一個係．．．．開餐

參加鴨仔團，最開心莫過於唔使用腦，上車落車，睇陣嘢又食嘢。
明明喫完午餐無耐，睇一個景點又去開餐，啱哂肥仔小小

。

喫飽飯，又上車落車，直踩入長隆，霸位睇馬戲。
上年先睇完，以為今年既馬戲會一模一樣；
但原來除咗最主打個幾樣，其他細節唔同咗，真係抵佢日日都咁多人嚟！

睇完馬戲，下一個節目係返酒店同周公談情。

[Day 2] 21 May 2010 (番禺 > 深圳)

小小真係太耐未跟過鴨仔團，以為尋日差不多行哂啲景點，
今日可以晏啲起身，點知07:30 morning call，08:00喫酒店早餐，09:00集合出發。

咁早出發去邊？去黃埔古港。
眾多師奶，個個期待去黃埔古港．．．．隔離個街市

。
ceo一落車，連景點都唔睇就直奔街市，買雞買番薯，
cheap cheap小小，俾得錢跟團，包哂景點入場費，
點都要入一入個景點，影兩幅相交差先飛奔去行街市

。

11:30 跟團既好處係唔使用腦之餘，就係唔會餓親。
早餐都未落哂格，又到下一餐．．．
呢個下一餐，仲要係四海一家自助餐添

上年試咗深圳既四海一家，今年試試番禺既，睇睇有咩唔同。
品種大致相同，只係午餐無鵝肝，無哈根打雪糕同鮑魚湯．．．．

可能上年已經食過，無咩新鮮感，再加上早餐未落格，
小小喫咗一舊牛舌之後，簡直當呢個甜品自助餐咁喫，
全程喫生果，沙律菜同甜品．．．．

四海一家自助餐賣點係有五百幾種食品供應，
最好笑既係，有供應番薯，糉

以為無人向自助餐時喫番薯呀，糉呀，小小竟然攞嚟喫！

出乎意料之外，細過隻蝦餃既蚊形糉，味道唔錯！

食完呢餐，自由活動時間，過隔離萬博中心，睇家俬，過隔離歐萊斯 (outlets)睇名牌。

14:30 自由活動時間結束，又係時間上車落車，返去深圳，準時18:00解散。
兩日一夜鴨仔團，無呃錢手信店，無昆入場費景點，下次唔想用腦之時，又可以去吓囉！